Iḍrisen n tussna

Iḍrisen i uselmed n wawalen n tetiknulujit tamaynut

Taqbaylit n uzekka : Ussan n taddart deg tallit n Web
Agbur
Nna Ḍrifa tsuddus timsirin deg taddart.
Dda Ḥemmu deg tejmaɛit s tfelwit n uselkem
Dda Muḥend d Dda Muqqran ikerrazen 2.0
Taddart tuɣal am lluzin. 
Tislit n Dda Caɛvan tessidig ifecka ar Teqbaylit.
Dda Ḥmimic, Ibenkan umḍinen (périphériques numériques) akked yell-is Tamila.
Dda Ḥmimic ad d-yaɣ tafelwit n uselkem
Nna Ḍrifa tsuddus timsirin di taddart

Nna Ḍrifa n Iwaquren d tameṭṭut s wazal-is. Terfed axxam-is, tesker-d arraw-is ɣas akken s lḥif imi argaz-is yettidir deg San Pitersburg di tmurt n Rrus.

Nna Ḍrifa teɣra cwiṭ ar imṛabḍen n iṛumyen. D ciṭ-nni n tmsuni i tt-yeǧǧan tseqdac tiliɣri tazirazt (téléphone mobile) iPhone i s-d-yuzen wergaz-is. Rnu ɣur-s, arraw-is meṛṛa ɣran. Yiwen deg-sen d ajenyuṛ n tsenselkimt (informatique), isem-is Maziɣ.

Nna Ḍrifa tegza timsal. Teẓra d akken tutlayt ass-a mačči kan d taqenduṛt taqbaylit neɣ tacmuɣt ɣef uɛrur. Ihi, sya ar da, tessutur i mmi-s Maziɣ ad s-yesselmed kra n tixbula (astuces) n iOS iteddun ɣef yibenk-is (périphérique) iPhone7.

Tuɣal tessen ad teqqen ar App Store akken ad tsebdedd isnasen (applications). App Store d yiwen n usmel srid (site en ligne) anida imdanen zemren ad d-sidren (télécharger) izegrar (modules) neɣ isnasen i iPhone, iPad neɣ iPod touch.

Tilawin deg taddart ẓrant meṛṛa d akken Nna Ḍrifa tedda deg tallit tamaynut. Tettidir am akken ttidirent akk tlawin deg umaḍal n umalu. Imi ulac amḍiq anida ara mlalent, acku ulac tijmuyaɛ n tlawin deg tudrin n yiqbayliyen, ttemlalent di tala. Din-a i tselmad Na Ḍrifa i tlawin-nniḍen amek ara sqedcent imseddayen n unadi (moteurs de recherche) Google akked Yahoo.

Tenna-yasent d akken send (avant) ad teddumt ar Google neɣ yahoo, yessefk ad tsenkremt Iminig Web (navigateur Web) am Firefox neɣ Chrome sakin ad tarumt tansa (adresse) neɣ isem n taɣult (nom de domaine) n umsedday deg ufeggag n tensa (barre d’adresse) n yiminig.

Temla-yasent daɣen amek ara rzunt ar tsanayt tilellit tamaḍalant (encyclopédie libre mondiale) Wikipedia. Din-a ad afent akk imagraden ttnadint. Yiwen n wass tega tamsirt ɣef tmerna n imagraden (articles) deg Wikipedia yerna s teqbaylit.

Nna Ḍrifa ur teqqim ara din kan. Yiwen n wass tmudd ula d tamsirt ɣef tudert tabadnit tumḍint (vie privée numérique). Tmeslay-d ɣef inagan n tuqqna (cookies), ammesten mgal aḍfaṛ (protection contre le pistage) akked useqdec n ipṛuksiyen http (utilisation de proxies http). Dɣa feḥent akk tlawin d tullas imi tatiknulujit tamaynut tserreḥ i tmeṭṭut taqbaylit akken ad d-ffeɣ seg insayen (traditions) i tettidir.

Tilawin n tudrin-nniḍen slant s waya. Ihi snulfant-d yiwet n tiddukla semman-as TilMoz (tilawin n Mozilla). Sya d afella, leqdic-nsent yettwasuddes akken iwata. Ayagi mačči d targit. S cwiṭ kan n wafud ad yili s tidett.

Dda Ḥemmu di tejmaɛit s tfelwit n uselkem

Dda Ḥemmu, ṭamen n udrum n Iḥiducen, ɣas akken zrin fell-as 65 n iseggasen, yettban am ilemẓi. Yeṛwa aman n temẓin. Ilul deg 20 yebrir 1952 ihi dɣa yettzuxxu s wazemz-is (date) n tlalit-is. Yeqqaṛ-asen i yilmeẓyen n taddart-is, nek d Amaziɣ s wudem amezwer (par défaut). Ɣas akken ugar n uzgen n tudert-is yewwet-itt deg Fṛansa, tutlayt Taqbaylit ur tt-yettu ara. Mačči am wid irezzun ar tmura n umalu tagara-agi. Akken yeqqaṛ Atmani, wa yuɣal d aɛrab, wayeḍ d aṛumi.

Dda Ḥemmu, iḥemmel ad d-yeffeɣ ar tejmaɛit yal tameddit. Ibiri deg idis, tafelwit n uselkem (tablette) gar ifassen-is. Deqs i yeɣilen d aselkim aziraz (ordinateur mobile: laptop) ameẓyan. Dda ḥemmu yezga yeqqaṛ-asen, ala, tagi qaṛṛen-as tafelwit n uselkem. Tetteddu s yiwen n unagraw n wammud (système d’exploitatoin) isem-is Android. Llant tfelwiyin-nniḍen n Apple qqaren-asent iPAD, acu kan teddunt s unagraw iOS. Dda Ḥemmu yezga yessefham deg-sen, acu kan ahbuh. Gullen ur gzan. Ḥatan ihi, yerna-d Dda Lwennas ɣur-s. Dda Lwennas, ɣas akken ur yeɣri ara, acu kan igezzu timsal imir imir. Ur tettunefk ara tegnitt ad yeddu ar uɣerbaz am netta am wiyaḍ. Imi yekker-d d agujil deg tallit-nni n tegrawla mgal Fṛansa.

Dda Lwennas isel i yilmeẓyen ticki ttmeslayen ɣef ayen icudden ar Internet. Yeẓra d akken d aẓetta i yesdukklen ibenkan (périphériques) n umaḍal meṛṛa. Yeẓra d akken mačči ala iselkimen kan, ula d iṛubuten n yeẓmi (Jus) neɣ timacinin n txeggaṭ zemrent ad qqnent ar uẓeṭṭa-agi agraɣlan. Acu kan, meskin, ur yessin ara ad yaru dɣa yeḥruri aṭas. Tikwal yesḥissif deg iman-is.

Dda Lwennas iḥemmel Dda Ḥemmu. Cerken tabaḍnit, myekcamen aṭas. Dda Ḥemmu seg tama-s, imi yeẓra tamsalt, yal tikelt ara yemlil yid-s, ad s-yesken kra n texbula (astuces) n tuqqna (connexion) ar Internet s useqdec n tfelwit n uselkim din-a deg tejmaɛit. Yemmel-ayas amek ttbeddilen iɣewwaṛen (paramètres) n tutlayt deg kra n yesnasen (applications) akked ifecka (outils). Yemmal-ayas amek ara yessel i yifuyla imeslawen (fichier audio) srid seg usmel Web (site web) war ma yessider-d (télécharger) isefka (donnée) ar tfelwit-is s wudem adigan (localement). Yemmel-ayas amek ara yernu amiḍan i tira n yeznan deg Gmail.

Imi lɛid tetteddu-d, dda Lwennas yenna-yas. Acu tenniḍ limer ad nheggi si tura tabdart (liste) n yemdanen ara yawin tunt deg timecreṭ-agi d-iteddun?
Dda Ḥemmu yegdeh. Ihi isenker asnas Excel akken ad bdun ad arun ismawen n ixammen n taddart. Yuzen iznan s yimayl i wid iseqdacen allalen atraren. Ma d wiyaḍ ad ten-iwali ticki.

Ar tagara yenṭeq Dda LWennas yenna-yas. A Ḥemmu, azekka ad nali ar Uqbu ad tedduḍ yidi, ula d nek ad d-aɣeɣ yiwet n tfelwit n uselkem, imi aseqdec-is mačči d ayen ẓẓayen. Rnu ɣur-s, ad izmireɣ ad inigeɣ sanida bɣiɣ, melmi bɣiɣ.

Akken i yella lḥa. Ddan yimdukal s Aqbu. Uɣen-d tafelwit n uselkem. Yal ass, dda Lwennas yettissin ugar. Ilmed ula d tira n tutlayt taqbaylit. Ass-a yessaweḍ ad isefrek (gérer) ablug (blog) yettmeslayen ɣef yensayen (traditions) n taddart-is s teqbaylit. Yessaweḍ ad yemlil ula d yemdukal-is iqbuṛen yellan agmaḍ akin deg Tizi Wezzu akked Tubirett.

Yal tameddit, Dda Ḥemmu akked Dda Lwennas, ad d-ffɣen ar tejmaɛit s tfelwiyin n uselkem gar ifasen, ad qqimen ad ttarun deg iblugen-nsen ɣef temsal icudden ar Teqbaylit tatrart deg ifecka imaynuten.

Dda Muḥend d Dda Muqqran ikerrazen 2.0

Ass-a d aḥaruq. Dda Muḥend Ameẓyan yekker af 4h00 tf (am). Yettheggi ad yeddu ar uɛerqub akken iḥuc timẓin yezreɛ d agguren aya. Iwala deg uwitay (calendrier) aqbayli ɣef uziraz-is (mobile) Android ma yella ass-a d ass n tmegra. Awitay yenna-yas-d d ass n tmegra ma yella ulac nda. Yuzen ihi SMS i Dda Meqqran akken ad t-id-issaki.

Seg tama-s, Dda Meqqran, akken kan i d-yermes (recevoir) izen SMS (message) n Dda Muḥend, isenqed (vérifier) aselkim-is (ordinateur) ma d tidett ass-a d ass n tmegra. Iɛerqa-s usiḍen (calcul). Iɣil imi yeḥma lḥal, ahat d ṣmayem n unebdu mačči d ussan n tmegra. Tameṭṭu-is tennayas-d d akken twala deg uwitay Lightning Aqbayli d akken ass-a d ass n tmegra. Yerna imi tsihel (programmer) asmekti ( un rappel), ulac deg-s ccek. Aselkim yesmekta-tt-id.

Dda Meqqran yekker ad yessiwel i Dda Muḥend akken ad s-yini iteddu-d. Akken yeɛreḍ ad yaru uṭṭun n tiliɣri ɣef uziraz-is, Android yebbugi (boguer). Yeskan-d yiwet n tuccḍa (erreur) ur tt-yegzi (comprendre) ara. Iɣil d ayen yexṣeṛ yibenk-is (périphérique).

Dɣa yerfa, ad yettɛeggiḍ, alḥif ma d tagi i d tatiknulujit. Sakin yuɣal-d s axxam akken ad iseqdec Viber i yessebded ɣef uziraz-is iOS, amer ahat ad issiwel i umdakel-is ma yeqqim-d kra n usmad (crédit) deg umiḍan-is (compte) acku aggur yezrin ur yules (répéter) ara ajerred (inscription) ar umeẓlu aziraz (service mobile).

Tagara yufa kra n iferdisen (unités). Issawel i Dda Meẓyan. Myefkan asiher (rendez-vous) deg ubrid n tala anida mlalen.

Send (avant) ad ddun deg ubrid ar uɛerqub, gan kra n tewlafin tama n ucercuṛ. Uznen tiwlafin-nsen ar Instagram, Asnas (application) n beṭṭu n tewlafin, akken ad ten-t-walin imdukal-nsen deg yal tamurt. Imi tura, amaḍal yuɣal meẓẓi, yuɣal d taddart. Ula d iɣriben yellan deg Marikan, Kanada, Spanya, Ṭelyan, Fṛansa, Alman, Tagduda yedduklen, Puland, Ukrin, Rrus d tmura-nniḍen deg yal amenẓaw, yezmer ad walin ayen iḍerrun deg tudrin tmurt n Iqbayliyen. Yern imir imir kan, s wakud ilaw (en temps réel).

Sakin mi yuznen tiwlafin-nsen. Ddan ar umahil-nsen (travail). Dda Muḥend yettḥuccu, ma Dda Meqqṛan ittara-ten d iqettunen.

S yin ar dda, ad steɛfun. Dda Muḥend iteqqen ar umiḍan-is VK s Teqbaylit. Yiwen n uẓeṭṭa n tmetti anida tikwal yettaru iznan n uɣrab (messages de mur) deg umaɣnu-is (profil) ɣef tmusni n tkerrazt (agriculture), tikwal yettazen tiwlafin-is (photos) neɣ tid n umdakel-is. Deqs n imdukal-nsen gedhen (surpris) ɣef wayen xeddmen. Ihi ttarun-d akk iwenniten (commentaires). Tikwal suturen-asen-d ɣef kra n temsal iccuden ar tkerrazt. Imi ɣas akken d ikerrazen (agriculteurs), seqdacen ifecka atraren akken ad idiren am nitni am imdanen n umaḍal meṛṛa.

Tagara n wass, uɣalen-d yemdukal ar ixamen-nsen. Makken kan fuken acucef, ččan imensi-nsen, qqnen s aẓeṭṭa akken ad rnun ad d-megren. Tikelt-agi d tamegra n tmusni s useqdec n tunigin deg Web, mačči d tamegra n temẓin.

Taddart tuɣal d lluzin

D ayen i nettidir ass n wass-a. S ya d afella, akka ara tili tudert-nneɣ. Imdanen meṛṛa ad ttwaqnen ar uẓeṭṭa. Yal amahil ad yettwag srid. Timliliyin ad ttwasuddsent s wudem anmeggag (à distance). Ayagi tewwi-t-id tetiknulujit tamaynut.

Nekk d amaslaḍ amzenzi (Analyste commercial), wweḍ-aɣ-d ar tnarit (bureau) ass-a 25 Yebrir 2017 af 2h00 md (pm) Akud n Tmurt n Iqbayliyen. Ldiɣ aselkim-iw (ordinateur). Suliɣ-d Thunderbird s Teqbaylit. Uffiɣ 60 n imaylen (Emails) i d-uznen imsaɣen (clients), imdukal, imḍebren n tkebbanit.
Yal imayl yegber azal n yiwet neɣ snat n tceqqufin (pièce). Yal taceqquft s teɣzi n 7 MAṬ (MO). Ur ẓriɣ ansa ara bduɣ.

Ɣas akken suddseɣ amiḍan-iw (compte) s ikaramen (par dossier), amsuddes awurman (auto organisateur) ur yexdim ara ayen ilaqen. Rnu ɣur-s, afecku amgalaspam (outil anti-spam) i sbeddeɣ yeǧǧa deqs n ispamen zegren-d ar tnaka-iw (ma boîte). Izmer ahat ddan-d ula d ivirusen. Acukan, amiḍan-iw ittummesten s AVG, yiwen n useɣzan amgalavirus ifazen aṭas.

Issefk ad suddseɣ timlilit akked Qasi n Ɛmer Usaɛid, Yidir n At Ufella, Meqqran n At Ɛisi, Tiziri n Icelladen akked Tanina n Tqerbuzt. Uzneɣ-asen tinnubga s useqdec n uwitay srid n Google. Muddeɣ-asen asiher af 17h00. Seddaɣ deg tinnubga afaylu PDF igebren ahil n temlilit.

Ayen ur teẓrim ara, imdanen-agi meṛṛa yal yiwen anida yella. Nekk aqliyin deg taddart tama n Tizi Wezzu. Ma d nitni ur ẓriɣ ara. Acu kan ad nemlil akken ad nmeslay ɣef kra n izwilen (chiffres) n wagguren yezrin. Akken walaɣ, ur nexdim ara aṭas. Azwil n uweẓlu (chiffre d’affaire) n Fuṛar d Meɣres udren aṭas. Ihi ad d-nezzi af taluft-agi akken ad tt-negzem deg awal, ad nwali amek ara nessali izwilen deg agguren d-iteddun.

S ya ar d-aweḍ temlilit, uriɣ deqs n yiznan. Amezwaru i tkebbanit Ifri. Sutren-d afaris ur nxeddem ara yakan tura. Afaris-agi zin-d fella-s mraw (10) n wagguren aya ur t-nexdim. Acku isafaren-nni i nseqdac ulac-iten deg ulzuz (marché). Ɣef aya i nuɣal ar tecreṭ-nni taqbuṛt (ancienne marque).

Sutreɣ afus i terbaɛt-iw. Uriɣ kra n iwellihen deg Evernote s Teqbaylit. Bḍiɣ tazmilt-nni (note) akked Qasi. Sakin Qasi ibḍa-tt akked wiyaḍ acku muddeɣ-as azref n beṭṭu (droits de partage). Yal yiwen iseɣtay deg tezmilt s wakud ilaw (temps réel). Ur nḍeggir ara akud deg awi terreḍ s suseqdec n tiliɣri, fax….

Sakin, ddiɣ ad inigeɣ deg Web. Senkreɣ Firefox s Teqbaylit. Ddiɣ ad waliɣ amaynut ɣef Odoo. Odoo d yiwen n usnas isefraken akk ikalan (processus) n tkebbanit. Walaɣ d akken akala n teɣbula timdanin (ressources humaines), yennerna aṭas. Tura isedduy ula d akud n uxeddim (temps de travail) s useqdec n usefrek n isenfaṛen (gestion de projet).

Werdin kan, walaɣ Skype ad d-iṭenṭun. D tiziri i d-yessawalen. Tebḍa-d agdil-is (écran) akken ad yi-d-sken amek ara sbeddeɣ anasiw Aqbayli deg Android, d wamek ara selḥuɣ LibreOffice, neɣ ad suqleɣ Linux s useqdec n Pontoon, yiwen n unagraw n usefrek n Tsuqilt (Système de gestion de traduction).

Ifuk wass, ur sawḍeɣ ara ad fakeɣ ayen suddseɣ iḍelli.

Tislit n Dda Caɛvan tessidig ifecka ar Teqbaylit.

Dda Caɛvan, d argaz ḥemlen warraw n taddart-is. Ḥemlent imi yennecraḥ. Ɣas akken deqs i d-yeṭṭef seg insayen iqbuṛen (anciennes traditions) n tmurt, acu kan hraw wul-is. Dda Caɛvan yewi-d tameṭṭut i mmi-s Yugurten semmus (5) n iseggasen aya. Tislit-is qarren-as Tafrara.

Ass-mi d-wweḍ Tafrara s axxam, tegdeh aṭas imi ula d yiwen deg uxxam n wergaz-is ur yeqqin ar uẓeṭṭa Internet (réseau).  Nettat teɣra taneflit Web (Développement Web). Deqs i tesnefli n ifecka (outils) Web s useqdec n tetiknulijiyin Web am HTML, CSS akked JavaScript. Yerna daɣen tessen ula d Python, yiwet n tutlayt n usihel (language de programmation) I yettuseqdacen s waṭas iseggasen-agi ineggura.

Wagi dayen tessen Tafrara deg akud-nni, semmus n iseggasen aya. Ass-a d ayen-nniḍen.

Tafrara twala d akken imdanen n taddart ur ssinen ara Taqbaylit tatrart. Ihi, thegga-d yiwen n wahil akken ad tessali aswir n twacult-is akked imezdaɣ n taddart n wergaz-is.

Dda Caɛvan yettzuxxu s teslit n mmi-s gar yergazen di tejmaɛit. Yeqqar-asen, wwiɣ-d agerruj i mmi. Ihi ula deg taddart, tilawin akk sawalen-as Lala Tafrara imi ttqadaren-tt aṭas.

Seg ass-mi d-kcem Tafrara ar taddart, tudert n imdanen tbeddel.

Tafrar tuɣal d tanedbalt n tutlayt Taqbaylit deg deqs n isenfaṛen deg Web. Tessuqul, tessidig s tutlayt-is: Taqbaylit.

Tafrara tseqdac deqs n wanawen n ifecka n tsuqilt. Ifecka n tsuqil srid deg Web, neɣ ifecka idiganen (locaux).

Deg tazwara, Tafrara tseqdec asmel Tansifex. Asmel-agi, d anagraw n usefrek n tsuqilt (Système de gestion de traduction). Ɣur-s yiwen n ugrudem (interface) fessus nezzeh. Send ad tebduḍ tasuqilt, yessefk amdan ad yernu amiḍan(compte). Ticki yettwasentem (confirmer) umiḍan, aseqdac (l’utilisateur) yezmer ad yeqqen. Deg usmel-agi, deqs n ifecka (outils) akked yesnasen (application) ttuheggan I usideg (localisation) s Teqbaylit.

Tafrara tefren kra n yisnasen. Di tazwara, tenna ttif xir limer ad nheggi ifecka iseqdacen tugett n yimdanen am iẓeḍwa n tmetti (réseaux sociaux), ifecka n usefrek n yiznan (outils de gestion de messages), ifecka n tunigin (outils de navigation), ifecka n usefrek n yiḍrisen (outils de gestion de textes), ifecka n usefrek n tezmilin (outils de gestion de notes),..atg.

Tafrara thegga-d meṛṛa allalen-agi. Yerna deqs seg imezdaɣ n taddart-is mudden-as-d afus. Ur teqqim ara kan din. Tafrara tessaram ahat yiwen n was, aselkim meṛṛa ad ittusefrak s teqbaylit. Tutlayt-is tayematt.

Ur d-muddeɣ ara isem n taddart n Tafrara. Taddart-is teẓram-tt akk. Qqaren-as Taqbaylit.

Dda Ḥmimic, Ibenkan umḍinen (périphériques numériques) akked yell-is Tamila

Dda Ḥmimic, sḍis n tmerwin d semmus (65) n iseggasen aya i yettidir deg taddart-is deg Sidi Ɛic. Ilul deg uḥriq deg yiwen n wass seg Tuber agim tza n twinas semmus n tmerwin d sin (1952), acukan ḥed ur yeẓri anwa ass. Acku imiren, tilawin ttarwent deg ixammen, deg iḥerqan yerna ulac anida ara yettujarred. Imi acengu afṛansis yesseɣli-d rrehba ɣef yiqbayliyen tallit-nni.

Baba-s yuli s amadaɣ am yergazen akk n tudrin deg akud-nni. Ulin ad d-ḥellin tamurt uhh!

Zrin sin n iseggasen seg asmi yeṭerḍeq waɛbaṛ. Ḥmimic kuẓ (4) n iseggasen deg uwtay-is (age). Ihi, yiwen n wass seg Ɣuct 1956, deffir kan n temlilit n ugraw n Ṣumam, yewweḍ-d lexbaṛ qerriḥen. Baba-s yeɣli deg annar n umennuɣ, flant akk iserdasen ifṛansisen s 20 n terṣasin. Tafekka-is ur d-wwid ar taddart armi ɛeddan 30 n wussan. Ḥmimic yeggra-d meskin d agujil. Ulac gma-s, ulac nanna-s. Ula d yemm-as terna kan kra n imalasen (semaines), yeɣli-d fell-as lehlak seg leḥzen imi yemmut urgaz-is. Terna ula d nettat temmut.

Ḥmimic yekker-d ar jedd-is Dda Wakli Muḥend Waɛmeṛ. Lqut ur ixxuṣ ara. Imi jeddi-s yekseb lmal, iḥerqan n uzemmur d tmeɣrusin. Acukan aɣerbaz ulac. Ihi iteddu d jedd-is sekra wanida yedda. Ama ar ssuq, ar uzemmur neɣ ar tyerza.

Ḥmimic mačči d isem-is. Isem-is n tidett Ḥmed. Acu kan makken yella meẓẓi, tilawin n taddart-is qqaṛent-as Ḥmimic. Dɣa yeggra-d yisem-agi.
Makken yella d aqruṛ, yettafeg, yettenṭiw, yetteqliliḥ, yejhel, yettenfufud ɣef ulac, am Tom Sawyer fiɣef yura Mark Twain. Yal ass d tadyant tamaynut. Acu kan yettaɣ awal.

Yefra ṭrad, tamurt tewwi timunent neɣ qrib.

Akken kan yefra trad, Dda Wakli Muḥend Waɛmeṛ yerfed Ḥmimic, imiren 10 n iseggasen deg uwtay-is, yewwi-t ar Tizi Wezzu ad yekcem ar uɣerbaz n warraw n imeɣrasen. Din-a i yebda Dda Ḥmimic taɣuri. Ihi yeqqim din 10 n iseggasen acu kan yettass-d tikwal ar Sidi Ɛic ad iḍil af jedd-is akked warraw n taddart-is.

Ass-nni mara d-yekcem taddart, d tameɣra. Ad t-id-maggren akk tarwa n taddart. Jedd-is yessuffuɣ lwaɛda. Imi d aqcic awḥid yerna d mmis n umeɣras. Jedd-is ur yettaǧa ṭbel neɣ d cḍeḥ. Irgazen s lbarud tilawin s teɣratin. Akka iɛeddan 10 n iseggasen makken yella deg Tizi wezzu.

Deg Tizi Wezzu i yessen temeṭṭut-is, Na Tasadit n Tizi n At Ɛica. Ula d nettat d jedd-is i tt-id-yewwin ar Tizi. Din-a i myeḥmalen.

Ihi yewen n wass asmi ifuk taɣuri, yewwi jedd-is akked xalt-is ar Tizi n At Ɛica. Walan-d imawlan n tmeṭṭut. Serkden, msegzan sakin kra kan n wussan, Na Tasadit tekcem-d Sidi Ɛic s lbarud d teɣratin. Yekker uhetwir deg taddart. Werǧin imezdaɣ n taddart ḥedṛen i tmeɣra am tin. Imi ass-a d ass n tmeɣra n ugujil. Lbarud, tiɣratin. Ula d ilmezyen ṣekṛen meṛṛa ass-nni. Ɣas akken Dda Wakli d amẓalu, ass-nni yeǧǧa-ten, ur yerfi ara acku mačči d ussan ara d-yuɣalen.

Ɛeddan wussan uɣalen-d wiyaḍ.

Ass-a Dda Ḥmimic, 65 n iseggasen i yeɛeddan fell-as. Acu kan mazal-it am uqrur. Ɣur-s ass-a 4 n warrac d yiwet n teqcict. Ɣaren akk. Wa deg uswir amenzu, wa deg uzwir alemmas, wa deg tesnawit, wiyaḍ deg tesdawit.

Deg taddart sawalen-as Dda Ḥmimic bu tmedwasin, acku claɣem-is d ubrinen yerna wwin-akk leḥnak-is.

Dda Ḥmimic ad d-yaɣ tafelwit n uselkem

Dda ḥmimic ifuk amahil deg tkebbanit 13 n iseggasen aya. Yeffeɣ-d makken yewweḍ ar 52 n iseggassen acku ɣur-s azref n 7 n iseggasen imi d mmis n umeɣras.

Tura yerra-tt i teksawt, tira akked Internet.

Imir kan, mi d-yeffeɣ seg tkebbanit, yedda ar yiwen n uɣerbaz uslig (école privé). Din-a i yeɣra cwiṭ ɣef useqdec n uselkim (ordinateur). Acu kan, ifent warraw-is. Ula d ameẓyan-nni, Aɣilas, yeqqaṛen deg uɣerbaz amenzu, amzun d urar i yetturar s ifecka (outils) ibedden deg uselkim-is. Dɣa dda Ḥmimic isemma-yas Mqidec umḍin (numérique).

Deg uxxam, yiwen n uselkim kan i yellan. Ticki kecmen-d warraw-is tameddit, yal yiwen ibeqqu ad t-iseqdec. Wa ad yebɣu ad yeqqen ar Facebook, wayeḍ ar VK, yiwen yebɣa ad isenker Skype akken ad iqesseṛ d yimdukal-is, weyeḍ yebɣa ad isenker anadi deg umsedday n unadi (moteur de recherche) Google. Ihi yal tameddit, arraw-is ḥrurin meṛṛa, tikwal ttennaɣen. Dda Ḥmimic yerra-yesen nnuba akken ad yeḥbes trad gar-asen.

Ayagi ur yefri ara tamsalt. Acku yelli-s Tamila iṣahas-d usrag aneggaru (dernière heure). Teɣli-yas-d nnuba ɣef 11:00 md (pm) imi d nettat i yettmuddun tallet (aide) i yemma-s ticki tewwed-d s axxam. Ihi ur d-lhi ara meskint i useqdec n uselkim.

Dda Ḥmimic tɣaḍ-it yelli-s. Dɣa yeggul. S uqaṛṛu n jeddi-m a yelli ar d am-d-aɣeɣ aselkim yerna i kem kan. Tenna-yas Tamila: ala a vava ḥebbu, Aɣi-yi-d Tafelwit n uselkem (tablette).

Dda Ḥmimic ur yegzi ara. D acu-t wagi a yelli?

Tenna-yas Tamila: Tettemcabi cwiṭ ar taccira (ardoise), acukan ɣur-s agdil (écran), anasiw (clavier), agrudem n uẓeṭṭa (interface réseau), tetteddu am uselkim, yerna sanida ṛuheɣ ad ttawiɣ yid-i.

Idrimen ulac ar Dda Ḥmimic. Ihi azekkayen, yedda yessuffeɣ yiwet seɣ tisan-is, yewwi-tt ar ssuq deg Ukfadu. Yezzen-itt.

Mi d-yuɣal s axxam, yegla-d s kra n isafaren. Tameddit mi d-kcem Tamila yenna-yas: Azekka ḥerkel ad neddu ar Bgayet. Ad d-naɣ tefelwit n uselkem.
Aɣilas yesla-d. Yenna deg ul-is: Awah!! Amek? Nettat ad d-awi tafelwit nek ad seddayeɣ acabcaq-agi?

Aɣilas ɣlin-d icenfiren-is. Baba-s iwala-t. Yenna-yas: Acu k-yuɣen Aɣilas a mmi?

Aɣilas yebra-d i yimeṭṭawen. Yenna-yas: A vava, imdukal-iw akk ɣur-sen aziraz Android (mobile Android).

Dda Ḥmimic yezmeḍ-d mmi-s ɣur-s, yenwa mm-is yettnadi ad d-yaɣ urar n uvidyu (Jeux vidéo). Yenna-yas: D acut uḥeckul-agi a mmi?

Dɣa arraw-is meṛṛa ṭerḍqen seg teḍsa. Yenṭeq-d Meqqran, amenzu gar-asen, yenna: Wava, d tidett, s uqeṛṛu-k ar d as-tiniḍ d aḥeckul. Win t-yennulen ur s-yeḍliq. Ad s-teḍru am win iɛecqen.

Dda Ḥmimic ur yegzi tigert. Yenna-yasen: Acu-t wagi a tarwa? Ad d-inim neɣ ala?
Tenṭeq-d Tamila tenna-yas: C’est un Smaɣt Phone Papa!!

Teɣli-d tsusmi deg uxxam acku ẓran akk acuɣer. Dda Ḥemmic yuɣal d azeggaɣ. Yebɣa ad yeṭerḍeq seg reffu. Acku yezga yesselmad Taqbaylit i warraw-is. Yezga yeqqaṛ-asen d akken deg uxxam ulac taɛrabt, ulac tafṛansist. D Taqbaylit kan ara yeddun.

Ihi Tamila tenn-yas: Ur ɣziɣ ara amek i s-qqaren s Teqbaylit.
Yenṭeq-d Meqqran yenna-yas: D tilifun acu kan yeḥrec. Qarren-as Tlifun uḥric neɣ tiliɣri tuḥrict.

Dda Ḥmimic yefreḥ imi arraw-is ddan deg umaḍal umḍin (monde numérique). Yeẓra d akken d wagi i d azekka n Teqbaylit.

Akken i yella lḥal, azekkayen Dda Ḥmimic yewwi tarwa-s yid-s ar Bgayet ad d-awin ayen ilaqen.